Жителите на Општина Кисела Вода, поточно од населбата Драчево, денеска со самоорганизација започнаа да ги пополнуваат дупките на дел од улицата Речиште, поради, како што велат, долгогодишно игнорирање од страна на надлежните институции.
Станува збор за улица која, според тврдењата на граѓаните, е раскопана уште од мандатот на поранешниот градоначалник Орце Ѓорѓиевски, а и покрај повеќекратните апели и барања, проблемот не бил решен ниту за време на мандатот на актуелната градоначалничка Бети Стаменковска.
Револтирани од состојбата и загрижени за безбедноста, жителите решиле сами да интервенираат, иако биле свесни дека ваквата постапка не е во согласност со законските прописи. Тие велат дека улицата со години претставува опасност за возачите и пешаците, додека реакција од Општината изостанува.
Иронично, токму денеска, кога граѓаните започнале со санација, од Општината биле испратени вработени кои ги информирале дека нивната активност е незаконска. Реакција за трајно решавање на проблемот, засега, сè уште нема.
Фото: Facebook/Ljubisa Petrovski
