Во првите часови од официјалното пуштање во употреба на системот „Безбеден град“, паметните камери регистрирале околу 500 сообраќајни прекршоци на територијата на Скопје.
Министерот за внатрешни работи Панче Тошковски преку објава на социјалните мрежи информираше дека бројката е значително пониска во споредба со периодот пред започнувањето на тест-фазата, кога дневно се евидентирале десетици илјади прекршувања на сообраќајните правила.
Според неговите зборови, во рок од два месеци бројот на регистрирани прекршоци е намален од околу 120.000 на неколку стотици дневно, што, како што нагласи, е директен резултат на зголемената сообраќајна дисциплина кај граѓаните.
Тошковски посочи дека позитивните ефекти веќе се видливи и во статистиката за сообраќајни незгоди. На подрачјето на СВР Скопје, бројот на повредени лица во сообраќајни инциденти е намален за 35 проценти, додека бројот на загинати е редуциран од 11 на 4 лица во споредба со претходниот период.
Министерот упати благодарност до сите совесни учесници во сообраќајот, истакнувајќи дека токму нивното одговорно однесување придонесува за побезбедни улици и спасени животи.
Тој додаде дека имплементацијата на „Безбеден град“ уште во првите часови покажува дека во земјава е можно спроведување на европски стандарди, нагласувајќи дека ваквиот пристап е патот кон побезбедна и поуредена сообраќајна култура.
