Истражните органи во Романија објавија нови, вознемирувачки детали за тешката сообраќајна несреќа во регионот Тимиш, во која загинаа седум грчки навивачи. Според официјалните наоди, возачот на комбето во моментот на несреќата бил под дејство на алкохол и дрога.
Како што пренесува романскиот медиум „Обсерватор“, обвинителството ги добило резултатите од токсиколошката анализа спроведена од Националниот институт за судска медицина (INML). Анализата покажала присуство на канабис, кокаин и алкохол во крвта на возачот.
Од обвинителството појаснуваат дека токсиколошки испитувања биле побарани и за останатите жртви, но засега резултати се добиени само за лицето кое го управувало возилото.
Во меѓувреме, истражителите ја отфрлаат шпекулацијата дека несреќата можеби била предизвикана од технички дефект или активирање на систем за асистенција при возење во лента, наведувајќи дека не постојат докази кои би ја поткрепиле таа верзија.
„Во предметот се води истрага за кривични дела тешка телесна повреда и убиство од небрежност. Токсиколошката анализа потврди присуство на психоактивни супстанции – канабис и кокаин, како и алкохол во крвта на возачот. Пронајдени се и два сомнителни плика со можни психоактивни материи, за кои сè уште се чека официјална потврда“, изјави портпаролката на Обвинителството при Судот во Лугој, Берта Серена Константинеску.
