Трудовиот инспекторат ќе поднесе кривични пријави против две компании поврзани со изградбата на објектот во Охрид, каде при пад во отвор за лифт трагично го загуби животот 28-годишниот Кристијан Љушев, јавува ТВ Алфа.
По двонеделна детална инспекциска постапка, надлежните утврдиле дека на градилиштето не биле почитувани основните законски стандарди за безбедност и здравје при работа. Поради тековната истрага, институциите засега не ги откриваат имињата на компаниите кои ќе се соочат со кривично гонење.
Според наодите, младиот охриѓанец бил ангажиран во фирма за уредување ентериери и несреќата се случила додека заедно со колега пренесувал метален дел со должина од околу два метра во објект во изградба. Во еден момент, тој паднал во незаштитен лифт-отвор, што било кобно.
Инспекциските служби донеле решение за привремена забрана за работа на целото градилиште, која се однесува на сите вклучени субјекти – инвеститорот, изведувачот и надзорниот орган – сѐ додека не се отстранат утврдените неправилности.
За небезбедните услови сведочи и таткото на починатиот, Валентин Љушев, кој неколку дена пред трагедијата бил на објектот за да му достави паричник на својот син.
„Слободно влегов во зградата и уште тогаш забележав отворени лифт-дупки без никаква заштита или ограда. Ми беше страв и веднаш му реков на син ми да внимава. Никој не може да ми го врати детето, но очекувам правда и одговорност“, изјави Љушев.
Од надлежните институции информираат дека по комплетирањето на целокупната документација, предметот ќе биде доставен до обвинителството, кое ќе одлучи за понатамошните правни чекори.
