Светски познатиот британски боксер и поранешен шампион во тешка категорија, Ентони Џошуа, бил повреден во тешка сообраќајна несреќа во Нигерија, во која две лица го загубиле животот, потврдија локалните власти.
Инцидентот се случил во понеделникот околу 11 часот наутро на автопатот Лагос–Ибадан, во близина на местото Макун, во сојузната држава Огун. Според првичните информации, луксузно теренско возило „Лексус“, во кое патувал Џошуа, удрило во стационарен камион покрај патот.
Џошуа, кој седел на задното седиште, се здобил со полесни телесни повреди и веднаш бил пренесен во специјализирана медицинска установа во Лагос. Од болницата информираат дека тој е во стабилна состојба, свесен и под постојан лекарски надзор, без потреба од итна хируршка интервенција.
На социјалните мрежи се појавија вознемирувачки снимки, на кои може да се види како боксерот, видно дезориентиран и во болка, е извлекуван од целосно уништеното возило со помош на случајни минувачи.
Според Федералниот корпус за безбедност во сообраќајот, постојат сомнежи дека возилото се движело со поголема брзина од дозволената, при што возачот изгубил контрола при претекнување. Истрагата за точните причини сè уште е во тек.
Две лица од возилото биле прогласени за мртви на самото место, а нивниот идентитет засега не е официјално објавен. Другите патници поминале без повреди.
Од полицијата во Огун соопштија дека телата на загинатите се пренесени во градската мртовница во Сагаму и упатија сочувство до семејствата на жртвите.
Џошуа престојувал во Нигерија по неодамнешниот камбек во рингот, каде по подолга пауза се врати со нокаут победа во шестата рунда против инфлуенсерот и боксер Џејк Пол во Мајами.
По трагедијата, бројни јавни личности изразија сочувство, меѓу кои и Џејк Пол, како и нигерискиот претседател Бола Ахмед Тинубу, кој порача дека земјата стои зад Џошуа во овие тешки моменти.
