Жителите на скопската населба Железара алармираат за сериозен безбедносен проблем. На локацијата каде што се изградени двете нови згради на главната улица „Коце Металец“, се појавило огромно свлечиште, кое го загрозува паркингот и самите станари. Веста и фотографиите ја споделува Инфомакс.
– Состојбата помеѓу зградата на Елена Лука и објектот на „Два брата градители“, каде се наоѓа казиното „Сенатор“, е повеќе од алармантна. Со последните врнежи, паркингот се спушти за најмалку еден метар и продолжува да се лизга надолу – вели еден од загрижените жители, кој ја споделува својата стравична ситуација со Инфомакс.
Тој апелира до Општина Гази Баба и градоначалникот Бобан Стефковски да реагираат веднаш и да постават потпорен ѕид, кој ќе спречи понатамошно пропаѓање на земјиштето. Според фотографиите, кои ги објавува Инфомакс, доколку не се преземат мерки, паркингот би можел целосно да се урне, а зградата би била во огромна опасност.
– Дојдов до информација дека зградата кај казиното нема шипови, што ја прави ситуацијата уште позагрижувачка. Општината има обврска да постави потпорен ѕид, а граѓаните веќе ја уплатиле сумата за оваа намена како дел од комуналиите. Ако не се интервенира веднаш, последиците можат да бидат сериозни – предупредува станарот, додавајќи дека Инфомакс ја следи целата ситуација со фотографии кои го покажуваат сериозното свлечиште.
Жителите на Железара се надеваат дека надлежните ќе реагираат на време и ќе го спречат понатамошното пропаѓање на паркингот и зградите, а веста и документарните фотографии кои ја илустрираат ситуацијата, ги споделува Инфомакс.
