Зелен картон во Македонија – 5.500 денари, во регионот – 5 евра – ќе се укине ли оваа давачка за граѓаните?

Една од давачките за возачите кои сакаат да патуваат надвор од Македонија е вадењето на зелен картон, кој воопшто не е евтин, а за него зборуваше пратеникот Оливер Спасовски.

Спасовски ѝ постави прашање на министерката за финансии, Гордана Димитриеска – Кочоска за високата цена на зелениот картон, при што посочи дека во Македонија се плаќа голема сума, додека во регионот давачката е минимална.

„Ова е важно прашање за македонските граѓани. Возачите се обврзани да имаат осигурување при регистрација и технички преглед на возилата за територијата на државата. Сепак, постои и можност тие кои патуваат во странство да бидат обврзани да купат осигурување т.е. зелена осигурителна картичка. Овој документ сè уште е неопходен за влез во странство и чини 5.500 денари со важност од една година. Цената на зелениот картон во земјите од регионот е значително пониска, т.е. изнесува 5 или 10 евра. Ги имам сите анализи, како и законски измени во Србија, БиХ, Косово и Црна Гора кои имаат посебни договори со неколку земји каде што може да се влезе без зелен картон. Македонија има таков билатерален договор со Словенија. Дали Владата планира да направи одредени промени со цел да им помогне на граѓаните за да не плаќаат високи цени?“, праша пратеникот.