38-годишниот Сергеј се бори за живот откако за време на божиќна забава на компанија во Москва испил коктел подготвен со течен азот. Инцидентот се случил во кулинарското студио „Игра на маси“, каде што настанот бил збогатен со гастрономска демонстрација пред гостите.
Според информации објавени од странските медиуми, познат готвач подготвувал атрактивни коктели користејќи течен азот – супстанца која во професионалните кујни служи за брзо замрзнување на состојки, но е исклучително опасна доколку не испари целосно пред консумирање.
Гостите, наводно, не биле информирани за ризиците, а готвачот го охрабрил Сергеј веднаш да го испие пијалакот. На видео што подоцна се појави на социјалните мрежи, се гледа моментот кога тој го испива коктелот, по што веднаш се фаќа за стомакот, се превиткува од болка и колабира.
Лекарите утврдиле дека течниот азот во неговото тело нагло се претворил во гас, што предизвикало екстремен внатрешен притисок и пукнатина на желудникот. Сергеј итно бил префрлен на интензивна нега, каде што му била извршена итна хируршка интервенција.
Иако е свесен и покажува знаци на опоравување, лекарите предупредуваат дека неговата состојба и натаму е сериозна и под строг медицински надзор.
Што се случува кога се консумира течен азот?
Експертите предупредуваат дека течниот азот врие бурно на собна температура и неговото внесување во организмот може да има фатални последици. Откако ќе влезе во телото, тој експресно се претвора во гас и го зголемува својот волумен дури и до сто пати.
Ова нагло ширење создава опасен притисок врз внатрешните органи, што може да доведе до руптура на желудникот, внатрешно крварење и сериозни оштетувања. Дополнително, екстремно ниската температура може да предизвика замрзнување на ткивата и дополнителни повреди.
Стручњаците нагласуваат дека пијалоците со течен азот се безбедни само доколку супстанцата целосно испари пред консумирање.
ВИДЕОТО:
