Уште еден од осудените за настаните од 27 април 2017 година излезе на условна слобода. Станува збор за Вилијам Михајловски – Вили, кој преку социјалните мрежи соопшти дека од 1 јануари официјално ќе биде на условна слобода и дека планира постепено да се врати на јавниот живот.
Во објавата, Михајловски најави дека од следната година повторно ќе настапува како музичар, со посебен фокус на традиционалната македонска музика и инструменти. Тој потенцира дека музиката за него претставува „лек за душата“ и дека преку настапите сака да го промовира македонскиот културен идентитет, при што ја остава политиката настрана.
Според судските одлуки, неговиот условен отпуст формално започнува на 31 декември 2025 година. Во изминатиот период, условна слобода добија и други осуденици за 27 април, меѓу кои Мунир Пепиќ, Оливер Поповски, Влатко Трајковски и други.
Медиумите информираат дека паралелно е поднесено и барање за повторување на судската постапка за случајот „27 април“, што повторно ја отвора јавната дебата за пресудите, одговорноста и правните последици од еден од најконтроверзните настани во поновата македонска политичка историја.
