Бигорскиот манастир предупредува на појава на измамнички интернет-страници и платени реклами што кружат на социјалните мрежи, а со кои безобразно се злоупотребува името на обителта и угледот на монашкото братство.
Во овие содржини, непознати лица шират лажни тврдења дека монасите наводно стоеле зад производство на разни препарати, меѓу кои и извесниот „BoneControl“, претставени како „лекови“ за коски и зглобови.
Манастирот преку својот официјален Фејсбук профил јасно истакнува дека:
- нема никаква врска со такви производи,
- никогаш не изработувал, промовирал или продавал медицински препарати,
- сите објавени „изјави“ или „интервјуа“ со монаси се фабрикувани и целосно невистинити.
Од таму појаснуваат дека станува збор за типична онлајн измама која се обидува да профитира користејќи ја довербата што верниците ја имаат кон манастирот и Црквата.
Граѓаните се повикуваат на голема претпазливост и да не нарачуваат такви производи, ниту да оставаат свои лични информации на сомнителни веб-страници, бидејќи препаратите се со непознато потекло и потенцијален ризик за здравјето.
Манастирот потсетува дека единствените вистински производи со нивен потпис се достапни само во манастирската продавница и преку официјалните канали на обителта. За случајот веќе се преземаат чекори за известување на надлежните институции за компјутерски криминал.
