Во Македонија, и покрај тоа што бројот на невработени лица е значителен, некои сектори постојано се соочуваат со недостаток на работници. Податоците на Државниот завод за статистика покажуваат дека во државата има над 10 илјади слободни позиции, особено во услужниот сектор, трговијата, подготовката на храна, преработувачката индустрија и во угостителските капацитети.
Работодавците наведуваат дека една од причините за ваквата состојба е тоа што многу невработени не вложуваат напор да ги усовршат своите вештини, па често е поедноставно за нив да останат зависни од државната помош. Дополнително, сезонските работници заминуваат во странство за летната туристичка сезона и не се враќаат, оставајќи празни работни места.
– Иако постојат програми за преквалификација и доквалификација, мал број луѓе се заинтересирани за нив. Не може никој насилно да ги натера да се пријават и да прифатат работа – вели Ангел Димитров од Организацијата на работодавачи. Тој додава дека компаниите кои имаат недостиг на квалификувани работници може да се обратат до Агенцијата за вработување за обуки, но проблемот е што интересот од невработените е слаб.
– Подобро е да ги обучиме нашите луѓе, отколку да увезуваме работници од странство. Кога се ангажираат работници од надвор, компаниите често обезбедуваат сместување, а киријата се регулира преку договор за работа, што во некои случаи значи и повисока плата – објаснува Димитров.
Претседателот на Бизнис-конфедерацијата на Македонија, Миле Бошков, додава дека во одредени сектори има постојана флуктуација на работници, што ја зголемува потребата од нови кадри. Сепак, тој истакнува дека голем дел од луѓето што се пријавуваат во Агенцијата за вработување бараат работа само формално, односно заради социјална помош или затоа што работат на црно.
Според статистиката, стапката на слободни работни места во третото тримесечје од 2025 година изнесувала 2,02%. Најмногу позиции имало во групата елементарни занимања, додека секторот сместување и услуги со храна забележал највисока стапка на слободни работни места – 3,69%. Најнизок процент слободни позиции е регистриран во секторот снабдување со електрична енергија, гас, пареа и климатизација, со само 0,22%.
