Целата раководна структура на СДСМ вечерва поднесе колективни оставки, информира партијата по завршувањето на седницата на Извршниот одбор.
Од СДСМ објаснуваат дека овој чекор е дел од „внесувањето свежа енергија“ и почеток на длабински реформи. На предлог на претседателот д-р Венко Филипче, заменик-претседателката, потпретседателите, генералниот секретар, организациските секретари, како и сите членови на Извршниот одбор, се повлекле од своите функции.
Оставките се доставени до Централниот одбор и лично до претседателот Филипче, кој го координира процесот на преструктуирање на партијата.
Според партиското соопштение, со овој „одговорен и морален потег“ се отвора пат за нов кадар, ново внатрешно организирање и мобилизација, со цел СДСМ да ја зајакне својата политичка позиција. На следната седница на Централниот одбор, Филипче ќе предложи нов состав на органите, а за секоја функција ќе се бараат „најкомпетентни личности“.
Овој чекор доаѓа по локалните избори на кои СДСМ загуби во поголемиот број општини во државата.
