На денешното рочиште за трагичниот пожар во ноќниот клуб „Пулс“, повторно се почувствува силниот револт на семејствата на загинатите. Додека рочиштето завршуваше и странките се упатуваа кон своите автомобили, група родители влегоа во вербална пресметка со дел од адвокатите кои ги застапуваат обвинетите – претежно бранители од Кочани пишува 360 степени мк.
Полициски екипи во голем број ја следеа ситуацијата во и околу судницата во Идризово и спречија ескалација. И покрај жестоките зборови, инцидентот не премина во физичка конфронтација.
„За колку пари се продадовте?“, „Ги убивате нашите деца по вторпат“, „Осум месеци ни ја рушите правдата“ – викаа родителите кон дел од адвокатите. Еден од нив возврати дека „законот налага секој обвинет да има свој бранител“, порачувајќи дека ја извршува својата професионална должност.
Пред почетокот на рочиштето, за медиумите зборуваше и Јулија Златкова, мајката на загинатиот Томас. Таа остро реагираше на бројноста на адвокатите од Кочани кои се појавуваат во овој случај.
„Свесна сум дека обвинетите мора да имаат адвокат. Но чудно ми е што толку многу адвокати од Кочани ги застапуваат. Немате ли совест кога нè гледате нас – родителите, нашата болка по децата? Или барем емпатија што загинатите беа ваши сограѓани? Тргнавме по правда, а по пат дознавме дека во Кочани имало многу корупција“, рече Златкова во својата изјава.
Веста ја споделвуа 360stepeni.mk.
ВИДЕО: 360stepeni.mk
