Утрово, при активирање на пумпите за препумпување на отпадните води од Скопското Поле, во селото Таор забележана е појава на пена во поголеми количини од вообичаеното. Пената се појавила во одводниот канал кој се влива во реката Вардар, а системот за препумпување ги опфаќа општините Гази Баба, Арачиново, Илинден, Петровец и околината.
„Општинските екипи, заедно со АД ‘Водостопанство’, веднаш излегоа на терен за увид и координација со надлежните институции за понатамошни активности“, изјави градоначалникот Коста Маневски.
За да се утврди природата и можните извори на пената, Институтот за јавно здравје, по барање на општината, земал примероци од водата и од самата пена. Истовремено, Зелениково поднесе пријава до Државниот инспекторат за животна средина, кој ќе ја преземе контролата и ќе предложи мерки за заштита.
Општината најавува дека јавноста ќе биде навремено информирана веднаш штом пристигнат резултатите од анализите и насоките од надлежните институции.
Фото: Kosta Manevski
