Фото: Принтскрин
Од вечерва, скопјани мора да го следат времето пред да го фрлат ѓубрето. Од 22:00 до 06:00 часот наутро е забрането оставање отпад во јавните контејнери, одлучи Советот на Град Скопје како мерка за намалување на хаосот со отпад во градот. Оваа забрана не важи за приватните канти пред домовите.
„Одлуката стапи на сила со потпис на градоначалникот Ѓоргиевски и предвидува забрана за оставање отпад во или околу контејнерите на јавните површини“, појаснуваат од Градот.
Скопје има 40 инспектори, од кои 11 се комунални, а 10 се редари. Прекршоците ќе се констатираат директно на терен. Во случај на поголеми количини или специфичен отпад што не е комунален, ќе се вршат контроли и врз фирмите.
Инспекторите ќе вршат патроли и по полноќ, со цел да се санкционираат прекршителите. Граѓаните кои ќе ја прекршат забраната ќе бидат казнети со 50 евра, а за правните лица казните се движат од 1.300 до 1.800 евра, зависно од видот на отпадот.
Скопјани велат дека мерката е добредојдена, но нагласуваат дека најважна е личната свест за зачувување на животната средина.
„Мерката е добра за сите, но важно е и самиот човек да има свест. Законот е добар, но ако не се почитува, ништо нема да се смени“, вели еден граѓанин.
„Јас лично не фрлам отпад по темнување, но прашање е колку ова ќе се спроведува. Кај нас чудата траат кратко, па ќе видиме како ќе биде по неколку дена“, додава друг граѓанин.
„Инспекторите не можат секаде да стигнат, па најважна е свеста на граѓаните. Кога ќе имаат ѓубре, треба да го фрлат на вистинското место и контејнерите да се празнат редовно“, додаваат од јавноста.
Од Јавното претпријатие „Комунална Хигиена“ најавуваат дека во почетокот казни нема да се изрекуваат, туку нивните ЕКО патроли ќе даваат само опомени. Ова е прв предизвик за новиот вршител на должност директор, Драги Митковски, веднаш по големата тридневна акција за чистење на градот од депонии со отпад.
