Адвокатот Игор Петковски доби парична казна од 1.000 евра поради постојаното одлагање на рочиштата во случајот со родилката Јилдиз Веапоска од Дебар. Поради тоа, судот одлучи да назначи нов бранител за да се спречи застара на делото.
Веапоска, која физички и психички беше сериозно оштетена, денеска низ солзи се присети на трагичниот ден од 27 август 2020 година, кога при породувањето го загуби матката, јајниците и еден бубрег. Таа истакна дека наместо радост од породувањето, се соочила со ужас и болка, завршувајќи во кома на клиниката КАРИЛ во Скопје.
„Не можам да се радувам, а се плашам дека судската пресуда нема да дојде пред август следната година, кога застарува делото. Правдата ќе ја барам и на протести, и во Стразбур“, изјави Веапоска.
Бајрам Несиноски, граѓанин кој денеска присуствуваше за поддршка, го оцени случајот како „тотален хаос“ и истакна дека мора да се открие вистината, иако ништо не може да го врати загубеното.
Истиот адвокат денеска беше казнет и за одлагања во судскиот процес против поранешниот градоначалник на Струга, Рамиз Мерко. Поради злоупотреба на правата што им припаѓаат на странките, Петковски доби дополнителни 2.000 евра казна за неодржување на двете рочишта.
Судијата Јордан Јованов појасни дека новиот бранител ќе може да застапува обвинетите и да ги штити нивните интереси, со цел да се спречи понатамошно пролонгирање на судењата.
