Јавното претпријатие „Комунална хигиена“ – Скопје започна тестирање на нова регулатива со која се ограничува фрлањето отпад во периодот од 22 часот навечер до 6 часот наутро. В.д. директорот Драги Митковски објасни дека мерката е насочена главно кон угостителите и дел од бизнис-секторот, кои, според нивните анализи, се меѓу најголемите создавачи на несоодветно одложен отпад.
„Токму ваквиот отпад ни создава сериозни потешкотии. Од него најчесто се оформуваат мали диви депонии околу повеќе критични локации. За жал, најголемиот дел од тој материјал се остава во период кога контролата е отежната“, изјави Митковски за Сител.
Митковски нагласи дека мерката е привремена и ќе се следи на дневна основа, со можност за прилагодување зависно од резултатите на терен.
„Ова е тест-фаза. Ќе видиме како ќе функционира и што ќе покаже во практика“, додаде тој.
Според новата одлука, ноќното одлагање смет е забрането, а прекршителите ќе се соочат со казни. Од претпријатието најавуваат поинтензивни контроли и апелираат до граѓаните и деловните субјекти да ја почитуваат мерката со цел намалување на дивите депонии и подигнување на хигиенските стандарди во Скопје.
