Фото: Принтскрин
Олена Стасиук (55) со потекло од Украина, синоќа извршила ужасен злостор — со кујнски нож му го пресекла грлото на својот деветгодишен син Џовани во нивниот стан во центарот на италијанскиот град Муџа, во близина на Трст. Полицијата, по дојава, го пронашла телото на детето во бањата и веднаш ја уапсила мајката, која по убиството се обидела да си го одземе животот.
Олена била поранешна сопруга на Паоло Трамеа (58), италијански државјанин и татко на малолетното момче. По нивниот развод, старателството му било доверено на таткото, а мајката имала дозвола да го гледа детето двапати неделно во својот стан на улицата „Маркони“.
Деветгодишниот Џовани, ученик во четврто одделение во словенечко основно училиште во Муџа, вчера повторно ја посетил мајка си, со договор дека ќе се врати кај таткото околу 21 часот. Но, кога ниту поранешната сопруга ниту синот не се јавувале на телефон, Паоло се вознемирил и побарал помош од полицијата и пожарникарите.
Кога службите влегле во станот, биле затекнати од морничава глетка — телото на момчето било во бањата, а според првичните проценки, било мртво со часови. Мајката била во тешка психичка состојба и со исеченици на рацете, по што итно била пренесена во болница.
Италијанскиот весник Il Messaggero објави дека ова семејство веќе било под надзор на судот и социјалните служби. Познато е дека мајката се водела во евиденцијата на Центарот за ментално здравје.
