Фото: Принтскрин
Судот во Белград му одреди притвор од 30 дена на 52-годишниот Дејан З., кој е осомничен дека на 4 ноември во населбата Борча извршил кривично дело – семејно насилство со смртен исход. Според информациите од портпаролката Ивона Чогуриќ, мерката е изречена со цел осомничениот да не влијае врз сведоците.
Несреќниот настан се случил во станот на неговата поранешна партнерка Веселинка С. (46), кога дошло до вербална расправија меѓу нив, во која подоцна се вмешал и нејзиниот сегашен партнер Новица Ј. (54). Според првичните сознанија, конфликтот прераснал во физички пресметки, а во тој метеж Веселинка паднала од терасата на висина од околу четири метри и починала на самото место.
Новица Ј. веднаш ја повикал полицијата и изјавил дека не се работи за несреќен случај, туку дека Дејан ја турнал неговата партнерка во текот на расправијата. Осомничениот, пак, на сослушувањето во обвинителството ги негирал обвиненијата, тврдејќи дека не ја допрел жената и дека падот бил резултат на „несреќен сплет на околности“.
По инцидентот, и Дејан и Новица биле пренесени на ВМА за укажување лекарска помош и тестирање на алкохол, при што било утврдено дека обајцата биле под дејство на алкохол. И двајцата се меѓусебно обвинуваат за настанот, но засега притвор е одреден само за Дејан З.
По налог на Вишото јавно обвинителство во Белград, телото на починатата жена ќе биде подложено на обдукција, која треба да покаже дали падот бил последица на несреќа или на насилна дејност. Истражната постапка е во тек.
