Тажна приказна од Велика Британија повторно го отвори прашањето за опасните предизвици на социјалните мрежи. Дванаесетгодишниот Оливер Горман од Манчестер почина поради инхалација на гас од дезодоранс, како дел од тренд познат како „хромирање“ – нов, екстремно ризичен предизвик кој се шири на ТикТок.
Неговата мајка, Клер Гилеспи, го најде без свест во неговиот кревет, помалку од еден час откако се пожали дека е уморен. Покрај него лежеше празна боца од дезодоранс, а подоцна во собата беа пронајдени и други празни боци од различни марки.
И покрај итната медицинска помош, лекарите само можеле да констатираат смрт. Обдукцијата покажа дека причината за смртта е труење со бутан, гас кој се наоѓа во повеќето аеросоли и дезодоранси.
„Беше прекрасен, мирен дечко“
Скршена мајка на сослушувањето раскажа дека Оливер бил „сладок, мирен и семеен дечко, со нежна, смирувачка енергија“.
„Не верувам дека сакал да си наштети. Можеби не знаел колку е опасно. Можеби само сакал да избега од моментот, но работите излегоа надвор од контрола. Тоа најмногу ме боли“, рече таа низ солзи.
Клер откри дека Оливер имал проблеми во училиштето, бил предмет на задиркувања, и родителите неодамна го префрлиле од училиштето пред семејното патување во Велс.
Опасни трендови на социјалните мрежи
Полициската истрага потврди дека се запознаени со предизвикот кој се шири на ТикТок. Млади, главно тинејџери, вдишуваат гасови од спрејови и аеросоли за краткотраен ефект на омамување.
„Не знам зошто го прават тоа и зошто го објавуваат, но е крајно застрашувачко“, изјави детектив Паркер.
Судијата Ендрју Бриџман предупреди на опасниот влијание на социјалните мрежи и најави препораки за заострување на правилата за продажба и предупредувачки етикети за можни смртни последици.
Семејството на Оливер ја започна кампањата „Oliver’s Awareness“ за подигање на свеста за опасностите од аеросоли, но и за врсничко насилство и влијанието на социјалните мрежи.
„Беше само 20 минути во собата – и веќе го немаше. Не знаев дека тоа може да убие дете, и тоа толку брзо. Родители, зборувајте со децата, обратете внимание, не им давајте ги овие спрејови“, апелираше Клер.
„Секој дечко добива дезодоранс за Божиќ… и токму тоа ме плаши најмногу“, додаде таа за „The Sun“.
