ДУИ ги демантира шпекулациите – Али Ахмети останува на политичката сцена

ДУИ остро реагираше на информациите дека нивниот лидер Али Ахмети планира да се повлече од функцијата. Портпаролот на партијата, Арбр Адеми, категорично демантира дека постои таква можност и најави дополнителна мобилизација на членството и симпатизерите пред вториот круг од локалните избори.

„Тоа е целосно неточна и измислена вест“, изјави Адеми за неколку медиуми, додавајќи дека повлекување на Ахмети не е тема на дневниот ред на партиското раководство.

Информацијата првично беше објавена од албанскиот портал „Фол“, кој се повика на неофицијални партиски извори и тврдеше дека Ахмети размислувал за заминување од активната политика по изборите одржани на 19 октомври. Според истиот медиум, тој наводно веќе разговарал за одлуката со најблиски соработници и политички партнери од Албанија и Косово, а официјалната потврда се очекувала по завршувањето на вториот круг.

Од ДУИ, сепак, сметаат дека целта на ваквите објави е да се поткопа моралот на нивните гласачи. „Овие дезинформации се обид да се демотивира нашето членство пред изборите. Али Ахмети нема намера да се повлече, напротив – резултатите од првиот круг ни даваат дополнителна енергија“, рече Адеми.

Тој посочи дека ДУИ постигнала подобар резултат од коалицијата „Вреди“, освојувајќи околу 23.000 гласови повеќе и поголем број советнички места. Централното претседателство на партијата ќе направи анализа на изборните резултати и ќе ја зацврсти стратегијата за претстојниот втор круг, со фокус на максимална мобилизација на гласачите.