Бугарскиот европратеник Андреј Ковачев објави порака на социјалните мрежи упатена до македонската јавност, во која потсетува дека повеќе од 216.000 македонски државјани веќе поседуваат бугарски пасош и со тоа формално се граѓани на Европската Унија.
Според него, ситуацијата изгледа парадоксално – дел од тие граѓани јавно се противат на внесувањето на Бугарите во македонскиот Устав, а во исто време самите стекнале бугарско државјанство врз основа на потврдено бугарско потекло и изјава за бугарска самосвест.
„На прв поглед делува шизофренично – не сакаат ни да слушнат за уставни измени, а во џеб го носат бугарскиот пасош. Со документите не се заведени само тие, туку и нивните најблиски – родители, браќа, сестри…“, истакна Ковачев, додавајќи дека истите луѓе во јавност често користат изрази како „источен сосед“ или „бугарски окупатор“.
Во меѓувреме, европратеникот Томас Вајц потсети дека Македонија сè уште е блокирана од Софија, а според него, токму прашањата за идентитетот го одложуваат напредокот. Тој изрази надеж дека по локалните избори ќе се направи исчекор со вклучување на Бугарите во Уставот, што би ја деблокирало европската интеграција.
И претседателката на Европската комисија, Урсула фон дер Лајен, го поддржа овој став, нагласувајќи дека уставните измени се единствениот пат кон напредок во евроинтегративниот процес.
Во поширокиот контекст на проширувањето на ЕУ, аналитичарите прогнозираат дека Црна Гора би можела да стане 28-та членка до 2029 година, поради динамичните реформи. Зад неа следи Албанија, која бележи напредок во борбата против корупцијата. За Босна и Херцеговина, Вајц смета дека сè уште се соочува со институционални слабости, а Србија и Косово – без заемно признавање, ќе останат заглавени на европскиот пат.
