Фото: Принтскрин
Состанокот меѓу американскиот државен секретар Марко Рубио и рускиот министер за надворешни работи Сергеј Лавров, кој требаше да се одржи оваа недела, е одложен – пренесува CNN, повикувајќи се на добро информирани извори.
Средбата на двајцата шефови на дипломатиите требаше да биде вовед во планираниот состанок меѓу претседателот на САД, Доналд Трамп, и рускиот лидер Владимир Путин во Будимпешта, но по последните случувања, и тој состанок е под знак прашалник.
Според изворите на CNN, одложувањето на разговорите меѓу Рубио и Лавров автоматски го поместува и планираниот термин за средбата меѓу Трамп и Путин, која требаше да означи продолжување на политичкиот дијалог меѓу Вашингтон и Москва.
Трамп, кој минатиот четврток разговарал телефонски со Путин, изјави дека двајцата лидери се согласиле „следната недела да се одржи состанок на високо ниво меѓу советниците на двете страни“.
„Американскиот тим за подготовка на разговорите ќе го предводи државниот секретар Марко Рубио, заедно со други високи претставници“, објави Трамп на социјалната мрежа Truth Social.
Меѓутоа, според извор од Белата куќа кој го цитира CNN, состанокот бил ненадејно одложен. Иако официјално не се наведени причините, дипломатски извори шпекулираат дека Рубио и Лавров имале различни ставови околу можните услови за завршување на војната во Украина.
