Фото: Принтскрин
Рускиот претседател Владимир Путин, во телефонски разговор со американскиот претседател Доналд Трамп одржан минатата недела, побарал целосна контрола врз Доњецк – стратешки значајниот регион на истокот на Украина – како услов за прекин на војната.
Ова го објави „The Washington Post“, повикувајќи се на два високи функционери запознаени со содржината на разговорот.
Путин веќе повеќе од една деценија се обидува да ја заземе оваа област, но украинските сили, кои се добро утврдени и ја сметаат за клучна одбранбена линија против рускиот напредок кон Киев, успешно го одбиваат секој напад.
Според изворите, барањето на Путин покажува дека тој не се откажува од своите претходни услови, кои ја задржаа ситуацијата во ќор-сокак, и покрај оптимизмот на Трамп дека е можен напредок во преговорите.
Во споредба со претходниот состанок во август во Анкорејџ, Алјаска, сегашниот територијален услов на Москва е нешто помал, што дел од официјалните лица во Белата куќа го толкуваат како потенцијален чекор напред.
Ниту Кремљ ниту Белата куќа досега не дадоа официјален коментар по повод информациите. Трамп, по средбата со украинскиот претседател Володимир Зеленски во петокот, не ја поддржа руската иницијатива, но во наредните недели планира нов состанок со Путин во Унгарија за продолжување на разговорите.
