Фото: Принтскрин
И покрај бројните безбедносни предизвици ширум светот, НАТО и понатаму го задржува Западен Балкан високо на својата агенда – порача заменик-генералната секретарка на Алијансата, Радмила Шекеринска, за време на состанокот на министрите за одбрана на земјите-членки.
Таа нагласи дека стабилноста на регионот е клучна за безбедноста на цела Европа, потсетувајќи дека мисијата КФОР останува најдолготрајната и една од најважните операции на НАТО, што сведочи за континуираниот интерес на Алијансата кон Балканот.
Во врска со руското влијание во регионот, Шекеринска предупреди дека постојано се водат обиди за дестабилизација преку хибридни закани, ширење дезинформации и политички притисоци.
„НАТО не седи со скрстени раце. Денес повеќе од кога било инвестираме во зајакнување на отпорноста на нашите општества и во унапредување на нашите одбранбени капацитети. Од самитот во Хаг испративме јасен сигнал – ќе го браниме секој сантиметар од територијата на Алијансата и нема да дозволиме да се доведе во прашање нашето единство“, изјави таа.
