Приведени две лица во Прилеп – делеле пари за гласање

Министерството за внатрешни работи спроведува низа активности во рамките на своите надлежности со цел изборниот процес да помине без пречки и во безбедна средина. Според засега достапните информации, не се евидентирани посериозни инциденти или нарушувања на јавниот ред и мир.

Утрово, околу 09:00 часот, на улицата „Дабничка“ во Прилеп, полициски службеници од ОВР Прилеп ги лишиле од слобода лицата Б.Х. (72) и Д.С. (36), двајцата од Крушево, поради сомнение за вмешаност во кривично дело „поткуп при избори и гласање“.

Во Полициската станица Прилеп, во врска со истиот настан, биле повикани и С.А. (28), М.А. (31), Ш.А. (40), Д.А. (22) и Џ.А. (36) – сите од Крушево, со привремен престој во Прилеп, информира МВР.

По целосно расветлување и документирање на случајот, ќе биде поднесена соодветна пријава.