Фото: Принтскрин
Тим научници од Канада и Кина направија револуционерен чекор во медицината – создадоа таканаречен „универзален бубрег“, кој би можел да се користи за трансплантација кај пациенти со било која крвна група. Откритието, според експертите, може значително да го намали глобалниот недостиг од донорски органи.
Како што објави порталот ScienceAlert, истражувачите успеале со помош на специфични ензими да ги отстранат антигените на крвната група А од површината на бубрегот донор. Со тоа, органот бил „претворен“ во тип О – универзална група што не предизвикува имунолошка реакција кај примателот. На овој начин, еден донорски орган би можел теоретски да биде компатибилен со многу поголем број пациенти.
Експериментот бил изведен на бубрег трансплантиран кај пациент со мозочна смрт, со одобрение од неговото семејство. Истражувачите го следеле функционирањето на органот во реални услови и забележале дека неколку дена по операцијата бубрегот работел нормално, без знаци на одбивање. Ова се смета за голем успех, бидејќи кај некомпатибилни трансплантации обично настанува брза и тешка имунолошка реакција.
Сепак, третиот ден по трансплантацијата научниците забележале повторна појава на антигените од типот А, што предизвикало реакција на имунолошкиот систем и прекин на работата на органот.
И покрај тоа, истражувачкиот тим смета дека овој резултат претставува клучен доказ дека органите можат привремено да се „неутрализираат“ со ензимски третман и да станат универзално применливи.
Стручњаците додаваат дека, доколку технологијата се усоврши, пациентите со крвна група О – кои моментално најдолго чекаат на трансплантација бидејќи можат да примат орган само од донор со иста група – би можеле да имаат многу поголеми шанси за навремено добивање на соодветен орган.
„Ова би можело целосно да го промени начинот на кој размислуваме за компатибилноста при трансплантација“, велат научниците.
