Фото: Принтскрин
Унгарскиот премиер Виктор Орбан позитивно ја оцени најавата дека американскиот претседател Доналд Трамп и рускиот лидер Владимир Путин наскоро ќе се сретнат во Будимпешта за да разговараат за можностите за ставање крај на војната во Украина.
„Најавената средба меѓу претседателите на САД и Русија е одлична вест за сите што посакуваат мир во светот. Подготвени сме!“, напиша Орбан на социјалната мрежа X. Подоцна откри дека имал телефонски разговор со Трамп, на кој било потврдено дека подготовките за мировниот самит се одвиваат според планот.
Трамп, пак, соопшти дека имал „долг и конструктивен“ разговор со Путин, по што било постигнато значително приближување на ставовите и договор за одржување состанок во унгарската престолнина.
Сепак, патувањето на рускиот претседател до Будимпешта би можело да биде комплицирано поради санкциите на Европската унија и забраните за прелет на руски владини авиони. Поради тоа, летот на Путин ќе мора да ја заобиколи поголемата територија на Европа, што би ја зголемило должината на рутата на околу 5.000 километри и би го продолжило времето на патување за приближно три часа во споредба со директниот лет Москва–Будимпешта.
