Фото: Принтскрин
Американскиот претседател Доналд Трамп и украинскиот лидер Володимир Зеленски вчера се сретнаа во Белата куќа, каде што разговараа за повеќе теми поврзани со безбедноста и воената поддршка на Украина. Една од главните точки на состанокот, според Зеленски, била можната испорака на американски крстосувачки ракети „Томахавк“.
Зеленски изјави дека разговорите биле „реални и отворени“, но истакна дека САД засега не сакаат да преземат чекори што би можеле да доведат до ескалација на конфликтот со Москва. „Русија навистина се плаши од ‘Томахавките’, бидејќи станува збор за исклучително моќно оружје“, рече тој на заедничката прес-конференција.
Украинскиот претседател на состанокот предложил можен договор – САД да ѝ испорачаат на Украина ракети „Томахавк“, а Украина, за возврат, да им достави борбени дронови произведени во земјата.
Иако средбата со Трамп ја оцени како „плодна и конструктивна“, Зеленски додаде дека очекува американскиот претседател да изврши дополнителен притисок врз рускиот лидер Владимир Путин за да се создадат услови за прекин на воените дејства.
