Фото: Принтскрин
Градот Сремска Митровица го прогласи понеделник, 20 октомври 2025 година, за Ден на жалост поради тешката сообраќајна несреќа што се случи кај селото Јарак, во која загинаа три лица, а повеќе десетици беа повредени.
Одлуката била донесена на вонредна седница на Градскиот совет, одржана утрово. Во соопштението се наведува дека за време на Денот на жалост знамињата на сите јавни институции ќе бидат спуштени на половина копје, а сите манифестации и настани со забавен карактер што биле во организација на градот и установите на културата се откажани.
Градската управа најави дека на семејствата на настраданите ќе им биде исплатена парична помош од по 200.000 динари за покривање на трошоците за погреб и други неопходни издатци.
Градоначалникот на Сремска Митровица, Бранислав Недимовиќ, изрази најдлабоко сочувство до семејствата на загинатите и им се заблагодари на здравствените работници кои, како што рече, покажале исклучителна храброст и професионалност при згрижувањето на повредените.
– Нека обвинителството и полицијата си ја завршат својата работа. Не сакаме да изнесуваме предвремени заклучоци, но сè укажува дека станува збор за човечка грешка. Тешко е и на возачот, и нему и на сите нас ни е искрено жал за оваа трагедија – изјави Недимовиќ.
