По несреќата што ја потресе Кочани, фронтменот на групата ДНК, Владимир Блажев – Панчо, беше итно префрлен во позната приватна болница, каде лекарите веднаш започнаа со третман за стабилизирање на неговата состојба.
На 21 март, повеќе медиуми го пренесоа соопштението од медицинскиот тим кој се грижеше за него. Во него се наведуваше дека состојбата на Панчо е под контрола и дека во моментот не постои директна закана по неговиот живот. Тоа ја разбуди надежта кај семејството и фановите дека ќе успее да се избори.
За жал, по неколку недели дојде трагичниот исход. Според неофицијални информации објавени од „Женски магазин“, здравствената состојба на Панчо се влошила пред околу три недели. Лекарите забележале дека почнале да му откажуваат бубрезите и белите дробови, поради што бил приклучен на апарати. И покрај сите напори и медицински интервенции, телото не издржало.
Истите извори пренесуваат дека до пред влошувањето тој бил свесен, зборувал и дури се движел, но неговата психичка состојба била исклучително тешка, што дополнително го усложнило процесот на лекување.
