Фото: Принтскрин
Рускиот претседател Владимир Путин одржа прес-конференција по својата посета на Душанбе, каде што изјави дека Русија останува посветена на договорот постигнат со американскиот претседател Доналд Трамп во Алјаска, пренесува државната агенција РИА Новости.
„Со Доналд постигнавме согласност дека треба да размислиме и да разговараме дополнително со нашите сојузници и партнери во Москва. Тој го спомна истото од своја страна. Станува збор за комплексни прашања што бараат време и дополнителна разработка, но ние се придржуваме до она што беше договорено во Анкориџ“, изјави Путин.
Рускиот лидер потенцира дека и натаму постои можност да се зачува Договорот за ограничување на стратешкото нуклеарно оружје (СТАРТ). „Дали следните неколку месеци ќе бидат доволни за да се донесе одлука за продолжување? Верувам дека ќе бидат, доколку постои добра волја од американска страна“, додаде тој.
Сепак, Путин истакна дека дури и ако САД се повлечат од договорот, тоа нема да претставува критична ситуација за Русија. „Во секој случај, ние се движиме според нашите планови“, рече тој.
Путин предупреди дека трката во вооружување веќе е во тек, а некои држави, според него, се подготвуваат за нови нуклеарни тестови. Тој најави дека Русија ќе ги обнови своите воени капацитети, додавајќи дека работата на новите системи е во завршна фаза.
„Скоро сме подготвени да го претставиме новото оружје што го најавивме пред извесно време“, заклучи рускиот претседател.
