(Видео) Потрагата е прекината: Пронајден починат еден од планинарите кои ги затрупа лавина во Словенија

Спасувачката акција под врвот Тоска во Јулиските Алпи во Словенија, каде што лавина затрупа тројца хрватски планинари, денеска попладне беше прекината поради опасни услови и ризик од нови лавини, соопшти Горската спасувачка служба на Словенија (ГРЗС).

Еден од планинарите бил пронајден мртов, додека другите двајца сè уште се водат како исчезнати. Акцијата за пребарување ќе продолжи во понеделник, пренесе агенцијата СТА.

Интервенцијата ја водеше Горската служба за спасување од Бохињ (ГРС), а дополнително беа ангажирани и екипи од спасувачките станици во Јесенице и Радовљица. Поддршка во операцијата дале и полициски службеници, информираше Полициската управа Крањ.

За време на пристапот кон погоденото подрачје, спасувачите наишле на двајца унгарски планинари кои се симнувале од Водниковиот дом, по што тие биле безбедно спроведени во долината.