Фото: Принтскрин
Катастрофалните поплави кои го зафатија бугарското одморалиште Елените на брегот на Црното Море однесоа уште една жртва, со што бројката на загинати се искачи на четири. Невремето предизвика огромни материјални штети и остави зад себе слика која жителите ја опишуваат како сцена од хорор филм.
Според сведочењата за бугарските медиуми, целиот крај е прекриен со кал и вода, а делови од патната инфраструктура се целосно уништени. Поплавени се првите катови од домовите и хотелите, оштетени се бројни возила, а паднати дрвја дополнително го отежнуваат сообраќајот.
Екипите за интервенција започнаа со расчистување и одводнување уште вчера, а денес работата продолжува со засилени активности. Во акцијата се приклучуваат и волонтери, кои помагаат на надлежните служби во справувањето со последиците.
Во меѓувреме, претседателот на Бугарија, Румен Радев, соопшти дека добил поддршка и од Македонија. По телефонскиот разговор со македонската претседателка Гордана Сиљановска-Давкова, Радев изрази благодарност за понудената помош.
„Благодарност до претседателката Сиљановска-Давкова за изразеното сочувство и за подготвеноста да помогнат во надминување на последиците од оваа катастрофа“, изјави Радев.
