Фото: Горан Герасимовски
Кандидатот за градоначалник и актуелен прв човек на Општина Центар, Горан Герасимовски, синоќа се сретна со жителите од населбата Крњево, каде што разговараше за идните планови и проекти кои ќе се реализираат доколку добие уште еден мандат на претстојните локални избори, стои во соопштението од неговиот изборен штаб.
На средбата, Герасимовски истакна дека во изминатиот период општината значително го намалила огромниот долг што тој го наследил при преземањето на функцијата.
Тој увери дека, доколку продолжи со досегашната динамика на работа, веќе од следната година Општина Центар ќе функционира без никакви долгови, што ќе овозможи поголем дел од буџетот да се насочи кон инвестиции и развојни проекти во корист на граѓаните.
„Не потрошив ниту еден денар од граѓаните на Центар, потенцирам, ниту еден денар, за патувања и оние непопуларни кафеани. Мислам дека сум единствен градоначалник во државата, кој не потроши ниту еден денар за непродуктивни намени, и сите пари, повеќе од 2 милиони денари ги пренаменивме за потребите на социјално ранливите граѓани“, рече Герасимовски.
