Почнува реализацијата на проектот „градски воз“ од Драчево

Кандидатот за градоначалник на Скопје, Орце Ѓорѓиевски, синоќа им се обрати на жителите на Драчево, каде средбата со граѓаните доби форма на вистински митинг.

На настанот присуствуваа и вицепремиерот и министер за транспорт и врски Александар Николоски, како и министерот за надворешни работи Тимчо Муцунски, кои дадоа поддршка на кандидатот. Ѓорѓиевски ја образложи својата визија за „достоинствено Скопје“, нагласувајќи дека токму граѓаните се основата за создавање модерен и функционален главен град.

Клучен момент на собирот беше најавата на Николоски дека веќе утре ќе се потпише договорот за почеток на проектот „Градски воз“ – иницијатива која треба да внесе нов квалитет во јавниот превоз. Првата линија ќе поминува низ Драчево, а патувањето до центарот на Скопје ќе трае само од 7 до 11 минути, што претставува голема придобивка за жителите на овој дел од метрополата.