Фото: Принтскрин
Францускиот претседател Емануел Макрон изјави дека Европа мора да биде подготвена за сите сценарија во случај руските борбени авиони да го нарушат европскиот воздушен простор.
„Според доктрината на стратешка двосмисленост, морам да нагласам дека ништо не може однапред да се исклучи“, изјави Макрон во разговор за германскиот весник Франкфуртер алгемајне цајтунг, одговарајќи на прашање дали Франција и нејзините партнери би поддржале соборување на руски авион доколку тој влезе во европскиот воздушен простор без дозвола.
Макрон посочи дека Европа со години ја потценувала Русија и ја нарече најголемата долгорочна закана за безбедноста на континентот. Како примери ги спомена мешањето во изборните процеси, хибридните напади, атентатите на политички противници, но и ширењето на дезинформации.
„Наивно би било да не сфатиме дека Русија создаде паралелна, невидлива армија во рамките на нашите демократии. Тоа се илјадниците анонимни дигитални ботови кои влијаат врз јавното мислење и ја разнишуваат довербата во институциите – во Франција, Германија, но и во цела Европа“, предупреди Макрон.
