„Путин подготвува напад на уште една држава“: Зеленски испрати предупредување до светот

Рускиот претседател Владимир Путин планира да го прошири војниот конфликт во Украина со отворање нов фронт во друга европска држава, изјави украинскиот лидер Володимир Зеленски. Тој ја обвини Москва за неодамнешните упади со дронови во неколку земји од НАТО, оценувајќи ги како тестирање на одбранбените капацитети на Алијансата, пренесува „Гардијан“.

Зборувајќи во Киев по средбата со американскиот претседател Доналд Трамп на Генералното собрание на ОН во Њујорк, Зеленски предупреди дека Русија се подготвува за поширок судир.

„Путин нема да чека да заврши војната во Украина. Ќе отвори нов правец. Никој не знае каде, но тоа е неговата цел“, изјави Зеленски.

Тој посочи дека Кремљ намерно ја проверува способноста на Европа да го заштити своето небо, откако руски дронови биле забележани над Данска, Финска, Литванија, Шведска, Полска и Романија, а руски ловци го нарушиле естонскиот воздушен простор.

Во петокот навечер дронови се појавиле над данска воена база, а наредниот ден и над норвешка и шведска. Зеленски истакна дека европските држави се соочуваат со сериозни предизвици во справувањето со оваа нова закана.

Претходно овој месец, Украина открила 92 дрона кои организирано летале кон Полска. Поголемиот дел биле пресретнати, но 19 навлегле во полскиот воздушен простор, при што полските сили собориле четири.