Фото: Принтскрин
Украина изврши напад со беспилотни летала и поморски дронови врз рускиот пристаништен град Новоросијск, при што, според тврдењата на локалните власти, биле оштетени неколку објекти. Гувернерот на Краснодарската област, Вениамин Кондратјев, изјави дека во нападот загинале најмалку две лица, а шестмина биле повредени. Овие информации засега не може да бидат независно потврдени, а официјален став од Украина сè уште нема.
Властите во Новоросијск, кој е важна црноморска лука со терминали за извоз на енергенси и жито, прогласија вонредна состојба. Во нападот бил погоден Конзорциумот за касписки нафтовод (CPC), каде што двајца вработени биле повредени. Сепак, портпаролот на компанијата соопшти дека нејзиниот терминал продолжува да функционира. Од „Деметра Холдинг“, фирма што управува со два терминала за жито во Новоросијск, информираа дека нивната инфраструктура не е оштетена.
Во последните месеци, Украина сè почесто ја таргетира руската енергетска и пристанишна инфраструктура со цел да ги намали приходите што Москва ги користи за финансирање на воените операции. Регионалните власти во Краснодар предупредија и на потенцијална закана за црноморската лука Туапсе, наложувајќи евакуација на дел од населението.
Новоросијск, сместен на руското црноморско крајбрежје, стана клучна база на руската Црноморска флота по серијата украински напади врз окупираниот Крим. Градот е најголемата руска лука на Црното Море и претставува стратешка точка за извоз на нафта, жито, јаглен, минерални ѓубрива и други суровини кон европските и светските пазари.
🔴BREAKING: Drones and naval drones strike Novorossiysk
— NEXTA (@nexta_tv) September 24, 2025
Local port hit, situation looks intense on video.
Fires in the city center, at least two dead.
Five residential buildings and a hotel damaged, according to the Krasnodar governor. The attack is still being repelled.… pic.twitter.com/22cuy4wrOg
