Фото: Принтскрин
Претседателката на Молдавија Маја Санду во драматично обраќање до граѓаните предупреди дека Москва директно го загрозува суверенитетот, независноста и европската иднина на нејзината земја. Настапот дојде по масовните рации и апсења на десетици лица осомничени дека учествувале во руски план за дестабилизација на државата.
„Денес ви порачувам со целосна сериозност – нашиот суверенитет, независност, интегритет и европска иднина се во опасност,“ изјави Санду во видео-обраќање синоќа, само неколку дена пред парламентарните избори закажани за 28 септември, на кои проруските партии ќе се обидат да му се спротивстават на владејачкиот проевропски блок ПАС.
Таа нагласи дека Русија вложува „стотици милиони евра за да купи стотици илјади гласови од двете страни на Днестар, како и во странство,“ додека јавниот простор секојдневно е преплавен со „десетици лаги“. „Стотици луѓе се плаќаат за да провоцираат нереди, насилство и да ги плашат граѓаните,“ додаде Санду.
Претседателката предупреди дека доколку Русија успее да воспостави контрола врз Молдавија, последиците ќе бидат директни и опасни не само за земјата, туку и за целата регија.
Молдавија по почетокот на руската инвазија врз Украина во 2022 година поднесе барање за членство во Европската Унија и истата година доби кандидатски статус. Минатата година беа отворени и преговорите за пристапување, што дополнително ги зголеми тензиите со Москва.
„Кремљ мисли дека сите сме на продажба, дека сме премали за да се спротивставиме, дека не сме држава туку територија. Но Молдавија е наш дом, а домот не е на продажба,“ порача Санду во своето емотивно обраќање.
