Фото: Принтскрин
Во Вишото јавно обвинителство во Зајечар пристигнаа резултатите од анализата на вештаците од Националниот центар за криминалистичка форензика во Белград, изработени врз основа на теренските податоци добиени при реконструкцијата на исчезнувањето и убиството на малата Данкa Илиќ.
Реконструкцијата беше спроведена на 16 јуни годинава во Банјско поле, кога детално беше „пресликан“ 26 март 2024 година – денот на исчезнувањето на девојчето. Обвинителството посочува дека станува збор за најобемната и најсложената реконструкција во историјата на српското правосудство, која се подготвувала еден месец и во која учествувале бројни сведоци, осомничени, мајката на детето, експерти, обвинители и полицијата.
„Резултатите на белградските вештаци покажуваат целосна усогласеност – временската рамка, изјавите на сведоците и материјалните траги. Сега останува да пристигнат и наодите од Факултетот за технички науки во Нови Сад, каде што дополнително се анализираат фактите“, велат од обвинителството.
Експертите од Нови Сад, меѓу другото, треба да утврдат дали возилото на осомничените навистина ја удрило девојчето, како и да реконструираат движење на сите возила во клучниот ден, до секунда. Освен снимањата од безбедносните камери, тие ги споредуваат и со изјавите на сведоци, а прават и други проверки кои засега не се откриваат во јавност поради истрагата.
Откако ќе бидат готови сите анализи, тие најпрво ќе бидат доставени до адвокатите на осомничените, со можност за забелешки или приговори. „Доколку нема несогласувања, а резултатите се совпаднат со постојните докази, обвинението останува непроменето и ќе биде предадено на Вишото обвинителство во Неготин. Ако се појават непоклопувања, постапката ќе мора да започне одново“, објаснуваат извори од обвинителството.
