Фото: Принтскрин
Србија е во жалост по смртта на 17-годишната Теодора Ристовиќ, која синоќа го загуби животот на операционата маса на Клиниката за кардиохирургија при УКЦ Србија. И покрај напорите на лекарите да ѝ вградат механичко срце како последна шанса за спас, тинејџерката почина од обилно крварење за време на сложената интервенција.
„Мојата Теодора почина синоќа во 23 часот. Последен пат ја видов пред да влезе во операциона сала, беше веќе успиена. Лекарите се бореа да ѝ го спасат животот, но не успеаја“, со солзи изјави нејзината мајка, Данијела Ристовиќ.
Теодора боледувала од вродена срцева слабост откриена пред една година, а единствен лек за неа билa трансплантација на срце. За жал, таа не ја дочека. Недостигот на донори во Србија, каде што многу семејства не даваат согласност за донирање органи по мождана смрт, повторно ја отвори дебатата за значењето на органското донорство.
„Мојото дете почина затоа што кај нас не постои доволно свест за донорството. Еден донор може да спаси повеќе животи. Сакам барем смртта на мојата Теодора да ги поттикне луѓето да размислат за тоа. Таа можеше да живее и покрај тешката болест, но ново срце никогаш не дочека“, додаде мајката.
Теодора и претходно се борела со животот – пред една недела двапати била реанимирана, при што срцето ѝ застанувало цели 45 минути. Тогаш лекарите успеале да ја вратат, но овојпат, за жал, борбата беше изгубена.
