Една девојка открива дека уште пред 12 години го пријавила Илија Стефановски во полиција, но таа не била единствената – постојат и други жени кои доживеале слични закани и малтретирања.
Од Хелсиншкиот комитет за човекови права информираа за „Слободен печат“ дека имаат податоци за најмалку четири жени кои од 2013 година па наваму го пријавувале Стефановски. Тие укажуваат дека тој им се заканувал, ги следел, ги малтретирал, а на јавни места пишувал навредливи графити со нивните имиња. Некои од овие жени повеќепати се обраќале во полиција – со пријави од 2013, 2017 и 2019 година.
Росица од Велес не била единствена жртва на неговото психолошко малтретирање. И други девојки со кои бил во врска доживеале слични ситуации, мака мачејќи се да прекинат контакти бидејќи тој не прифаќал.
„Со него бев во врска година и половина. Кога кажав „не“, тоа не го прифати. Постојано ми се јавуваше, ми пишуваше и се појавуваше на местата каде се движев. Имаше драматични испади и закани дека ќе се убие ако не бидеме заедно“, сведочи една од жртвите, чие име е познато на редакцијата, но е заштитено на нејзино барање.
Таа открива дека првпат го пријавила во полиција уште во 2013 година, откако ѝ го одзел телефонот и со него праќал мејлови во нејзино име, со цел да ѝ наштети, а се заканил и на нејзината сестра. И покрај ова, малтретирањето продолжило – од графити со навреди, до физички напад што ја однел во болница.
Девојката додава дека кога изгубила интерес за него, започнала нејзината голгота. Стефановски ја обвинуваше дека е љубоморна и ја пријавуваше во Скопје, додека институциите често не постапуваа соодветно.
Адвокатката Катерина Котеска Стисниоска вели дека условните осуди за семејно насилство не се доволни и нагласува дека полицијата и центарите за социјални работи често не ја штитат жртвата на соодветен начин. Според неа, сторителите треба да се подложат на строг третман и ефективна казна затвор, вклучително со психијатриско лекување.
По двојното убиство и самоубиството во Велес, Министерството за внатрешни работи најави проверка за евентуални пропусти, но одговорноста делумно ја префрли кон Обвинителството и судот. Обвинителството потврди дека Росица повеќепати барала заштита, вклучително забрана за приближување и контакти, кои сепак не биле доволно спроведени.
Стефановски постојано ја вознемирувал Росица – од навреди и закани, до физички напади и уништување на имотот. Велешкото обвинителство поднесе обвинение за загрозување на сигурноста на Росица и за нанесена повреда. Психијатриското вештачење покажа дека тој не бил психички болен, ниту имал патолошка опсесивност.
Убиството се случи на 15 септември, кога Стефановски со нож ги нападна Росица и нејзиниот татко, а потоа изврши самоубиство. Полицијата потврди дека на местото на настанот биле пронајдени мртви Росица и нејзиниот татко, како и Стефановски.
