Европа поради Русија ќе гради „ѕид со дронови“ – ќе потрошат милијарди евра

Европската унија планира забрзано да вложи милијарди евра во изградба на таканаречен „ѕид од дронови“, со користење на технологија која веќе е тестирана на боиштата во Украина, објави Фајненшл тајмс. Овој потег доаѓа како одговор на неодамнешните руски упади во воздушниот простор на земји-членки на НАТО.

Минатонеделната реакција на инцидентите во Полска и Романија покажа дека НАТО користи скапа технологија за пресретнување на релативно евтини дронови, што претставува сериозна ранливост која Москва може дополнително да ја искористи. За да се надмине овој проблем, Европската комисија ги охрабрува земјите-членки да употребат заеднички фондови за набавка на системи кои се покажале ефикасни во Украина.

Неколку часа по инцидентот, кога борбени авиони на НАТО соборија дел од 19-те дронови кои навлегоа во полскиот воздушен простор, претседателката на Европската комисија, Урсула фон дер Лајен, изјави дека Европа мора да изгради „ѕид од дронови“ на својата источна граница.

„Тоа ќе биде европски капацитет кој ќе се развива, распореди и одржува заеднички, со можност за реагирање во реално време“, нагласи фон дер Лајен.

Таа додаде дека ЕУ ќе формира и „сојуз за дронови“ со Киев, кој ќе биде поддржан со шест милијарди евра, со цел „украинската инвентивност да се претвори во предност на боиштето и во заедничка индустријализација“.