Оваа недела, на 21 септември, православните верници ќе го одбележат празникот Рождество на Пресвета Богородица, познат меѓу народот како Мала Богородица – еден од најзначајните празници на црковниот календар.
Иако денеска е еден од најпочитуваните празници, неговото востановување доаѓа подоцна, по слабеењето на паганските традиции, кога христијаните започнале да ја изразуваат почитта кон Мајката Божја.
Во народното предание, Богородица се почитува како заштитничка на мајките и на жените што очекуваат пород. Затоа жените кои се подготвуваат за раѓање ја повикуваат нејзината помош, а оние што немаат деца, според обичаите, се молат пред нејзините икони во црковните храмови.
За празникот се врзуваат и одредени народни верувања и забрани – не се препорачува да се чисти, пере или да се започнуваат нови работи, туку тие да се одложат за следните денови.
По повод празникот, во сабота на 20 септември, во храмот посветен на Рождеството на Пресвета Богородица во центарот на Скопје, со почеток од 17:00 часот ќе се служи празнична вечерна богослужба. По литургијата ќе се одржи свечена Литија со иконата на Пресвета Богородица – Троеручица низ централното градско подрачје. Од скопската епархија ги повикуваат сите верници молитвено да се придружат на овој настан.
