Министерот за внатрешни работи, Панче Тошковски, реагираше на убиството во Велес при кое животот го загубија Росица Коцева и нејзиниот татко, а сторителот потоа се самоуби. Тој нагласи дека Министерството за внатрешни работи поднело кривична пријава против лицето, но дека понатамошните постапки се во надлежност на обвинителството и судот.
Тошковски истакна дека е недозволиво да се манипулира јавноста за политички поени и укажа на институционалните надлежности:
– Кој во оваа држава изрекува мерка притвор, и кој во оваа држава изрекува мерка затвор односно казна затвор? Кој во оваа држава согласно закон може да предложи мерка притвор, кој во оваа држава единствено може да поднесе обвинение? На првото прашање одговорот е единствено судот може да определи мерка притвор, на второто прашање единствено обвинителство може да предложи мерка притвор. Во оваа ситуација, јас не велам дека имало или немало вина и во рамки на постапувањето на МВР. Има внатрешна контрола, ќе покаже истрагата дали Министерството затаило или не затаило, ама срамно е да се лаже јавноста и да се манипулира јавноста Тошковски е крив. Зошто? Зошто судот досудил условна осуда. Зошто е Тошковски крив? Заради тоа што јавното обвинителство не побарало притвор – рече министерот Тошковски.
Тој додаде дека во јавноста треба да се отвори дебата дали за вакви кривични дела санкциите се доволно строги и дали Законот за кривична постапка бара измени.
Во однос на протестите најавени пред МВР за случајот во Велес и другите случаи на фемицид, Тошковски истакна дека не го оспорува правото на протест, но потсети дека во државата јасно е дефинирано кој е надлежен орган за обвинение, а кој за донесување пресуда.
Министерот уште еднаш повтори дека МВР ги презело сите потребни дејствија и поднело кривична пријава, но праша:
– Изрекол ли судот мерка притвор за убиецот? МВР поднело кривична пријава. МВР ги презело дејствијата што требало да ги преземе. Дали тие биле навремени, соодветни, согласно професионални стандарди ќе провериме ама ја поднело кривичната пријава. Зошто обвинителството не побарало притвор? Зошто судот кога ја донел пресудата донел условна пресуда? Зошто не донел казна затвор? Да донел казна затвор и да утврдел мерка притвор сега Росица ќе беше жива – рече Тошковски.
