Кандидатот за градоначалник на Скопје од ВМРО-ДПМНЕ, Орце Ѓорѓиевски, гостуваше во емисијата Претрес со Ландов.
Ѓорѓиевски со голема увереност изјави дека по претстојните избори очекува да ја преземе градоначалничката функција во главниот град.
„Јас го живеам сега својот сон. Ние имаме најдобар премиер. Јас не сакам да бидам по градоначалничкото место во Скопје премиер, министер можеби“, рече Ѓорѓиевски.
Тој откри дека стресот од работата му предизвикал здравствени проблеми, па затоа во иднина сака повеќе време да посвети на своето семејство.
Во интервјуто се осврна и на проектите во Кисела Вода, истакнувајќи дека останува нерешен проблемот со Центарот за зависници, но посочи дека има напредок со изградбата на спортската сала во Припор, како и со велосипедските патеки.
Иако не секогаш бил задоволен од својот тим, вели дека се смета за добар менаџер.
„Јас бев прв кој се извини за Данела. Тоа ќе го поправам, ќе поправам за се што им направи на скопјани и тоа ми е дополнителен мотив. Данела и Каја не ми се таргет“, изјави Ѓорѓиевски.
Меѓу неговите приоритети го нагласи и уредувањето на просторот на Вардариште, каде што најави зеленило, парк и целосно нов изглед на овој дел од Скопје.
