Зеленски: Полска не е способна да ги заштити луѓето во случај на масовен воздушен напад

Украинскиот претседател Володимир Зеленски изрази загриженост за способноста на Полска да се справи со евентуален масовен руски воздушен напад. Повод за ваквата изјава е инцидентот од минатата недела кога 19 руски дронови влегоа во полскиот воздушен простор, а полските сили успеаја да соборат само четири од нив.

Во интервју за „Скај њуз“, Зеленски ја спореди ефикасноста на украинската противвоздушна одбрана со полската, нагласувајќи дека Киев веќе има големо искуство во одбивање на руските напади. „Нашите воздушни сили користат системи за противвоздушна одбрана, мобилни единици, воени авиони и дронови-пресретнувачи. Сето тоа функционираше против 810 воздушни цели, од кои беа уништени 700. Тоа е значајна бројка“, изјави тој.

Зеленски додаде дека разликата е очигледна: „Доколку Украина успеа да собори 700 од 810 цели, а Полјаците имаа 19 дронови и уништија само четири, тогаш е јасно дека тие не можат да ги заштитат своите граѓани ако се соочат со масовен напад.“