Фото: Принтскрин
Според информациите од МВР, во 15:30 часот во СВР Велес било пријавено дека на улицата „Кочо Рацин“ е пронајдено женско лице со повреди од остар предмет. Станува збор за 31-годишната Р.К. од Велес, која била пренесена во Општата болница во градот, но лекарите само ја констатирале нејзината смрт.
Набргу потоа, во домот на нејзиниот татко на истата улица, полицијата го пронашла и неговото тело. Починатиот К.К. (68) исто така имал повреди од остар предмет.
Во домот бил затекнат и И.С. (39) од Скопје, поранешен партнер на Р.К., кој имал сериозни повреди од остар предмет. Според првичните информации, се сомничи дека токму тој ги нападнал жената и нејзиниот татко, а потоа сам се повредил. Иако бил пренесен во болница, и кај него била констатирана смрт.
„Денеска (15.09.2025) во 15:30 часот во СВР Велес е пријавено е дека на ул.,,Кочо Рацин“ во Велес е пронајдено женско лице со повреди од остар предмет. На местото излегоа полициски службеници и констатираа дека се работи за Р.К.(31) од Велес, која од Итна медицинска помош е пренесена во болницата во Велес, каде што е констатирана смрт. Веднаш потоа, во домот на нејзиниот татко на истата улица, пронајден е починат и татко и К.К.(68) , кој исто така, имал повреди од остар предмет. Во домот со повреди од остар предмет е пронајден и И.С.(39) од Скопје, поранешен партнер на Р.К., за кој според првичните информации постои сомнение дека ги нападнал двајцата, по што сам се повредил. Откако е пренесен во болницата во Велес и кај него е констатирана смрт. Увид врши јавен обвинител во содејство со увидна екипа на СВР Велес и се преземаат мерки за расчистување на случајот“, соопшти МВР.
