Фото: Орце Ѓорѓиевски - Orce Gjorgjievski
Најновата анкета на јавното мислење, презентирана вечерва од јавниот сервис, ја прикажува поделбата во македонското општество околу оценката за актуелната состојба во државата, но истовремено и постоење на умерен оптимизам кога станува збор за иднината.
Според резултатите, речиси секој втор граѓанин очекува подобар живот во следните години. Конкретно, 48,1 проценти од испитаниците изразиле оптимистички ставови – 19,7 проценти веруваат дека животот значително ќе се подобри, а 28,4 проценти сметаат дека ќе има барем умерено подобрување.
Спротивно на тоа, 21,3 проценти од анкетираните се песимисти. Од нив, 10,8 проценти очекуваат состојбата делумно да се влоши, а 10,5 проценти предвидуваат сериозно влошување на животниот стандард. Меѓутоа, значаен дел од населението – 19,4 проценти – смета дека воопшто нема да има промени и дека животот ќе остане на сегашното ниво.
Анкетата открива дека јавното мислење во Македонија е речиси подеднакво поделено околу прашањето во која насока се движи државата.
Според резултатите, 47 проценти од граѓаните сметаат дека земјата оди во погрешна насока. Од нив, 29,8 проценти се убедени дека тоа е целосно погрешна насока, додека 17,2 проценти сметаат дека државата барем делумно тргнала наопаку.
Од друга страна, 44,6 проценти од анкетираните гледаат позитивно – 14 проценти веруваат дека Македонија се движи во вистинската насока без резерва, а 30,6 проценти оценуваат дека насоката е генерално исправна, иако не целосно.
